الكل تقريبا معتقد ان الاختراقات هي سبب تغيير شكل التطبيق، الكلام دا مش دقيق تماماً، الأستاذ غير شكل تطبيق ذا أميريكان إنجلش وطليق إلى نفس شكل تطبيق أكتوكود لسبب آخر
المشهد الأول : ما بعد إنشاء أكتوكود مباشرة
معظم الطلاب متفقين على أن تطبيق ذا أميريكان إنجلش شكله القديم جميل وحلو ومحبب للنفس وفيه ميزات كتير، زي مشاهدة الحلقة وتحميل الملخص بسهولة من ميديا فاير، وكمان تقدر تحتفظ بالكلمات في بنك الكلمات، وكمان التطبيق فيه أسئلة على ٩٩ في المية من الدروس، وفيه ميزة المحادثة مع مستخدمي التطبيق ووو إلى آخره من المميزات اللي احنا كلنا عارفينها وحاببينها
تطبيق ذا أميريكان إنجلش القديم كان أقرب الكمال
تطبيق طليق لما الأستاذ أنشأه كان برضو شكله جميل وواضح وسهل التصفح ومقسم لمستويات، وكل مستوى مقسم لوحدات، وكل وحدة مقسمة لدروس، وتقدر تشاهد الدرس اللي انت عايزه ثم تقرأ الملخص مباشرة من التطبيق دون خروج من التطبيق، وبعدين تراجع الكلمات وتحتفظ بيها في بنك الكلمات، ثم حل أسئلة على الحلقة، وتقدر بعدين تراجع الكلمات كفلاش كاردز
يعني شغل فاخر من الآخر
تطبيق أكتوكود أول ما ظهر كان بتصميم جديد ومميز ومناسب للمبرمجين، بنشاهد الدرس ونقرأ معلومات إثرائية وحاجات زيادة عن الدرس ثم نحل أسئلة
والتطبيق كان آخر حلاوة
المشهد الثاني: ما بعد إنشاء أكتوكود بمدة قصيرة
لما أنشأ الأستاذ تطبيق أكتوكود بقا كدا في ٣ تطبيقات مختلفة ب٣ أشكال مختلفة
وكون شكل التطبيق مختلف يعني بالضرورة أن أكواد البرمجة في كل تطبيق من التلاتة مختلفة
مما يعني أن الأستاذ أو فريقه لما يحب يعدل أي جزئية في أي تطبيق هيحتاج يقرأ معظم كود التطبيق عشان يفتكر طريقة ومنهجية التطبيق دا عشان يقدر يعدل عليه بالطريقة المناسبة للتطبيق، حتى لا يكون التعديل الجديد شكله مختلف وشاذ عن باقي تصميم التطبيق
ولو فيه مثلاً ميزة جديدة الأستاذ عايز ينزلها في ذا أميريكان إنجلش وطليق وأكتوكود فهيحتاج يكتبها ٣ مرات مختلفة بأكواد برمجية مختلفة بشكل يناسب كل تطبيق ويتوافق معاه
ومش محتاج أقول دا هيكلف قد ايه تعب وجهد ووقت وحتى فلوس، (لأن الأستاذ طبعاً موظف ناس يشتغلو على التطبيقات، الموضوع مش ببلاش)
طبعاً اتضح دلوقتي حجم المشكلة، أي تعديل في التطبيقات هيتكلف ٣ أضعاف الجهد والوقت والفلوس
المشهد الثالث: ما بعد إنشاء أكتوكود بمدة طويلة وما قبل الاختراقات
الأستاذ أدرك المشكلة دي، وتوصل لفكرة توحيد التطبيقات، مش بس توحيدهم في الشكل، لأ الأستاذ أعاد بناء ذا أميريكان إنجلش وطليق من الصفر على نفس نهج أكتوكود
فبكدا الشكل والتصميم والبرمجة الداخلية للتطبيقات ال٣ بقو كلهم زي بعض تماماً
طبعاً الدروس والعناوين هي اللي هتكون مختلفة
والأستاذ توصل للفكرة دي من قبل ما تبدأ محاولات الاختراق أصلا، وبدأ يشتغل عليها مباشرة
المشهد الرابع: ما بعد الاختراق بقليل
لما تطبيق ذا أميريكان إنجلش اختــُرِق أصبح عند الأستاذ خيارين:
١- إما يصلح الإختراق وينزل تحديث والتطبيق يشتغل مية مية
ثم بعد شهر أو شهرين يكتمل توحيد التطبيقات فينزل التحديث
ودا مش أفضل اختيار، لأن الجهد والوقت والمال في إطلاق تحديثين أكتر من أنه يطلق تحديث واحد
٢- يعطل التطبيق تماماً ويخليه خارج العمل ويسرع جداً عملية توحيد التطبيقات، وطبعاً لما الأستاذ هينزل تحديث بالشكل الجديد للتطبيق الاختراق هيزول، لأنه تطبيق مختلف تماماً عن السابق
ف الاختيار دا مش هيكلف جهد ولا فلوس زيادة، الأستاذ هيخلي التطبيق برا الخدمة، ويركز تركيز تام على تسريع توحيد التطبيقات
فالأستاذ عمل كدا بالفعل وخلى التطبيق برا الخدمة (حد فاكر الفترة اللي التطبيق القديم كان مش شغال فيها؟ كنا بندخل على التطبيق نلاقي ان التطبيق خارج الخدمة، حد فاكر الفترة دي؟ ما بعد الاختراق وما قبل تغيير شكل التطبيق)
المشهد الخامس: التطبيقات الجديدة
الأستاذ وحد التطبيقات ال٣ بالفعل، وبناهم كلهم على نفس الكود والشكل، مفيش بينهم أي اختلاف
فبالتالي أصبح سهل أنه لو حصل أي مشكلة في واحد من التلاتة الأستاذ يكتب نفس الكود بنفس الشكل في ال٣ تطبيقات
ولما حصل بعدها اختراق ثاني الأستاذ عرف الثغرة فين وقفلها في ال٣ تطبيقات مع بعض بنفس الكيفية ونفس الكود
ولو الأستاذ حب يضيف أي ميزة للتطبيقات فكل ما عليه أنه يكتبها مرة واحدة وهتتطبق في التطبيقات الثلاثة، من غير ما يبرمجها هنا بطريقة وهنا بطريقة وهنا بطريقة
ودي طبعاً حاجة إيجابية وكويسة، لكن للأسف كان ليها عيوب برضو، وكلنا حالياً بنشتكي منها، الشكل المميز لكل تطبيق كان هو روح التطبيق، لما اتغير الشكل للأسف كأن التطبيقات كلها بقت مسوخ، الدروس بدون بنك كلمات وبدون ملخص وبدون أسئلة (ودا أسوء شيء)، ميزة المحادثة اللي كانت في ذا أميريكان إنجلش راحت، التطبيق بيعلق وبيجلتش كتير جداً، زمان كنا بنشوف إعلان لكل درس، حالياً ٧ إعلانات لكل درس لو كان يحتوي على أسئلة ومراجعة للكلمات، إلخ
إلى آخره من العيوب والمشاكل اللي الكل عارفها ولا داعي لذكرها
أظن كدا بقا واضح ايه السبب الحقيقي وراء تغيير شكل التطبيقات، طبعاً محدش يظن أني بدافع عن المخترقين ولا حاجة، دول ولاد *** وربنا ينتقم منهم، لكن لازم الكل يعرف أن السبب الحقيقي لتوحيد التطبيقات الثلاثة هو تسهيل نزول المميزات وسد الثغرات، لكن في المقابل كان فيه عيوب كثيرة جداً جداً
شكراً لصبركم على القصة الطويلة دي 
