قبل البدء: التطبيق له جانب جيد وجانب سيء، احرص على الاستفادة منه بالجانب الجيد، وابتعد عن الجانب السيء
أنا دخلت التطبيق وكنت مركز على إيجاد أشخاص لتحسين المحادثة، فدخلت مباشرة على قسم connect وكنت بدور على الأشخاص اللي عايزين يتعلمون لغة عربية بس، مش كذا لغة، عشان الي عايز يتعلم كذا لغة مع بعض، عادة بيكون مستواه ضعيف في كل اللغات، وكمان كان فيه قسم للمتعلمين الجادّين، دول التطبيق لما يشوفهم مجتهدين بيحطهم في القسم دا
وكمان التطبيق بيمكنك من عمل فلترة للأشخاص بحسب دولتهم، (يعني تحدد أشخاص من دولة كذا بيظهرهم)
بس فيه هنا تِرِكّة، بعد ما يفلتر، هتلاقي صورة البروفايل فيها علم الدولة، تمام ؟ العلامة دي غير موثوقة، يعني ايه؟ يعني عادي جدا أي حد ييجي من الشارع يقول أنا من أمريكا، والتطبيق هيحطله علم أمريكا
طيب ازاي أعرف الناس اللي فعلا فعلا في أمريكا ؟
بيكون مكتوب جنب صورة الشخص اسمه ونبذه عنه، وبعض الناس مكتوب تحت النبذة بلدهم، وبعض الناس لأ
الدولة الحقيقية للشخص هي المكتوبة تحت النبذة، مش علم الدولة اللي في صورة البروفايل
وسعات مش هتلاقي اسم الدولة فمش هتقدر تتأكد أنه من أمريكا
التطبيق بيسمح ب١٠ أشخاص جدد تكلمهم في اليوم
فأنا كنت بدخل كل يوم أبعت ل١٠ أشخاص، كنت ببعتلهم (أنا سلمان من مصر أتحدث العربية، وأريد تحسين مهارة التحدث، وأستطيع مساعدتك في تعلمك للغة العربية، سواء بالفصحى أو بالعامية المصرية، وكذلك إجابة أسئلتك)
طبعا الرسالة كنت ببعتها بالإنجليزي
المهم
أنا كنت مواظب على كدا لمدة حوالي اسبوع، يعني دخلت كلمت ٧٠ واحد، والحمد لله بعد اسبوع كدا لقيت واحد رد عليا 
آه والله، كلمت ٧٠ واحد، وواحد منهم رد
٩٠ في المئة من الناس مش هيخش على المحادثة، و اللي هيخش منهم مش هيرد، والله العظيم كلام حقيقي وتجربة شخصية
وفيه واحد عجيب كدا دخلت أكلمه قلتله أنا عايز اتعلم إنجليزي وهساعدك تتعلم عربي، قام عمللي حظر
طب أنا عملتلك ايه عشان تعمللي حظر !!
المهم
اعمل اللي أنا عملته دا، ولو كلمت ١٠٠ واحد، وواحد بس منهم رد فما تزعلش، دي نسبة طبيعية جدا
الشخص اللي رد دا بقا، كان من كندا، وأبوه وأمه مصريين، بس هو ما عاشش في مصر
المهم
اتصلنا بمكالمة صوتية على التطبيق، واتفقنا أننا هنتكلم بالإنجليزي والمرة الجاية هنتكلم بالعربي
اتكلمنا بالإنجليزي والحمد لله كان فاهمني وكنت فاهمه (كنت في المستوى الأول ساعتها على ذا أميريكان إنجلش)
بعد يومين قلتله جاهز نتكلم عربي ؟ قاللي معلش أنا داخل على فترة امتحانات ومش فاضي خالص
قلت عادي مفيش مشكلة وبدأت أكمل رحلة البحث، قعدت أكلم ١٠ أشخاص لمدة أسبوع تاني ومحدش بيرد، وبعضهم بيردو ونوصل لدرجة أننا نتفق على المعاد، وبعدين ما يردوش بعدها تاني
لحد ما زهقت وسبت التطبيق
يعني سبب تركي لتطبيق التحدث مع الأجانب، اني مش لاقي أجانب أتكلم معاهم 
أنا مش فاكر اسم المستخدم لحسابي هناك بس أظن انه واحد من دول
@slmanmohamed
@slmanmohamed2
زوروني وشوفي منشوراتي 
طبعا إذا كان واحد من اسمين المستخدم دول صح 
لو حد جرب تطبيق من التطبيقات دي يحكيلنا قصته فيها وهل فعلا أتكلم مع أجانب ؟ وهل فهمهم وفهموه ؟
