في البداية انا بذاكر مع نفسي تقريبا ً من ٣١/٧ اللي فات
من الكورس بتاع مستر ابراهيم وقبل كدة كنت في مكان ما لكن عندي مشكلة اني معنديش صبر اني امشي في الطريق الاكاديمي بحب اذاكر مع نفسي اتطورت عندي الاستماع لما خلصت المستوي الاول لكن كل معمل تيست يتقالي بتفكر بين الجمل شوية وكمان حصيلتك اللغوية مش متحدثة ( قديمة) والجرامر بتاعك بسيط
مش حاسس بتطور في المحادثة مهما اعمل وكل الاقتراحات بتاعت شوف حد وكدة مش موجودة
اتمني حد متخصص او جرب يجاوب مش اي اجابة وخلاص
إعجابَين (2)
أنا عن نفسي كنت ضعيف جدا في التحدث زمان وكذلك في المستوى الأول شوية
بداية من المستوى الثاني بتبدأ تستغني شوية عن التعلم بالعربي بل ان فيه كورس اسمه “التفكير بالإنجليزي” وهتدرس تعريف الكلمة بالإنجليزي بدلا من ترجمتها
بس بردو مكنش بالنسبالي كفاية في المستوى التاني فكنت لما براجع الدروس أشرح الدرس لنفسي بالإنجليزي بصوت عالي، وكذلك كنت باتكلم بالإنجليزي حتى لو لوحدي، مستوايا مكنش خارق، بل كنت بأتلعثم كتير وبقف كتير،، عادي دي حاجة متزعلش، دي لغة إضافية للغة اللي انت متقنها (العربي)، حاليا الحمد لله التحدث عندي أفضل بكتير جدا ولسه في المستوى الثاني، ناقصني بس التعود على التحدث في مواقف عديدة وتوسعة المفردات واستخدام المصطلحات التي تعطي انطباعا على تقدمك في اللغة، بس انا لسه في المستوى الثاني
فنصيحتي ليك متستعجلش أبدا، ده مهم، متستعجلش، ان شاء الله هتوصل بس بالتدريج
وأنصحك بتجربة طريقة المستر في فيديو ده
انا شخصيا مقدرتش انتظم عليها عشان كده موضعتهاش في الاول عشان الامانة بردو
4 إعجابات
طريقه المستر دي بجد بجد الافضل!
أنا بطبقها حاليا وملاحظه اكييد فرق بمستوايا
لكني بزيد عن 5 دقائق لانها مكانتش كفايه بالنسبه لي أنا محدده وقت للمحادثه بيكون نص ساعه اخبص فيهم براحتي
وكمان استعملت chat gpt علشان يساعدني في انه يسئلني اسئله مفاجئه مثلا او يختارلي المواضيع الي لازم اتكلم عنها
كان مرات بيقولي مواضيع معرفش عنها حاجه من ناحيه اللغه ف اقعد مش عارفه اوصف حاجه او اعبر
ف اقوم بعد الجلسه دي سامعالي بودكاست مثلا عن نفس الموضوع واقعد املي اسبوعي بنفس الموضوع او على الاقل اكتر من مره بالاسبوع عن نفس الموضوع
ف لاحظت حاجتين
أولا بشكل لاواعي الكلمات الي اوريدي عارفاها بس مكنتش عارفه اوظفها بعد سماعي ليها بسياقات التعبير عن الموضوع دا بديت اعرف استخدامها
ثانيا في كلمات كتير مهم بتخدم الموضوع مضطره اتعلمها جديده علشان اتكلم بالموضوع بحريه اكبر ف دا باجي كتابته
ورايحه على Cambridge dictionary
بدور على ال definition واتعلمه بالانجلش
ولو استصعب عليا الامر اوي بدور على ترجمه الكلمه، ولكن لما اعرف الكلمه بال definition الانجلش لاحظت انه اسهل عليا اتذكره جداا ولو نسيت الكلمه بتذكر ال definition الي بيقودني بيها
ف نرجع لنواتج الرحله الي للآن مستمره حتى اوصل لمستوى الفلوينت بإذن الله
اولا بديت في اني عندي حصيله لغويه كتيره لكني مش عارفه استخدمها ازاي ولا اوظفها ازاي
بعدين لاحظت اني دلوقتي قادره اوظف اغلبها
ثانيا بعد م تستنفذ حصيلتك اللغويه هتلاحظ ان مكنش عندك حصيله لغويه كافيه ولا حاجه وانت متقدرش تتكلم بمستوى كلام عميق بمستواك الحالي ف دلوقتي هيجي وقت المجهود الي هتبذله
هتلاحظ اثناء بذلك للمجهود انه موجه اكتر او عارف انت بتبذل مجهود علشان ايه
ف أي بودكاست ولا مجله ولا كلمه جديده هتلقطها وتركز عليها بدماغك وتكررها علشان يمكن تفيدك في جلسه المحادثه التاليه الي هتجريها
أنا بقالي يعتبر شهر ونص على الحال دا واقدر اقول اني تطورت جدا ولكن الي باقيلي اكبررر واشق من الي عدا
ف م علينا الي الصبر وان نعمل كل الي نقدر عليه 
إعجابَين (2)
طبيعي جدا لانك لسه باادئ
بإذن الله مع استمرارك بالكورسات بتلاحظ تطورك
وتقدر تدعم الكورسات بحاجات تانيه
زي بودكاستز تناسب مستواك
وكتب زي Oxford bookworms مقسمه ل مستويات على حسب مستواك
واستخدم chat gpt علشان تتكلم معاه
وقبل م تتكلم معاه قوله يتصرف ك شخص طبيعي وعادي يقاطعك وزوده دائما بطريقه الكلام الي حابب يتكلمها معاك
سواء ك شخص من الشارع ولا محاضر ولا اكاديمي الخ الخ
3 إعجابات
خلص المستوى الرابع رح يكون كل شيء عندك ممتاز
إعجاب واحد (1)
أنا زيك السبب هو الفون
ماسكه أغلب الوقت الفيديوهات بتضيع الوقت.
بدأت النهاردة، عملت مكان مناسب للمذاكرة وهادي.
بعدت عن الناس
بقفل الفون إلا البرنامج؛ لاني بستعمله منه.
الصراحة فرق معايا، ومكدبش عليك أحيانا بنتكس.
يعني مثلا دي تاني مرة أشوف المستوى الأول بعد ما كنت دخلت على التاني؛ لأني انقطعت فترة طويلة.
الحل مكان هادي، ابعد عن المشتات، الدفتر بتاعك، وبالتكرار كل حاجة هتبقى كويسة جدا.
@SAma1 ممكن تقوليلي بنستعملي شات gpt الصوت ولا المحادثة، وبتكتبي له إيه وبالعربي ولا الانجليزي
إعجابَين (2)